Frika e përhapjes globale të koronavirus që ka shpërthyer në Kinë, ka shqetësuar edhe FIA-n. Federata Ndërkombëtare e Automobilizmit që është organi drejtues i të gjitha garave sportive me makina në botë, ka reaguar sot në lidhje me këtë situatë shumë të vështirë. “Pas epidemisë së koronavirusit që shpërtheu në Kinë në fillim të vitit, FIA po ndjek nga afër situatën në zhvillim me autoritetet përkatëse dhe klubet e saj anëtare, nën drejtimin e Presidentit të Komisionit Mjekësor të FIA-s, profesor Gérard Saillant. FIA do të vlerësojë kalendarin e garave të ardhshme dhe nëse është e nevojshme, do të ndërmarrë ndonjë veprim që kërkohet për të ndihmuar në mbrojtjen e komunitetit global të motorsportit dhe publikut më të gjerë”, thuhet në njoftimin e fundit të FIA-s.