Komisioni Evropian ka prezantuar strategjinë “AccelerateEU”, që synon të adresojë rritjen e çmimeve të karburanteve fosile dhe varësinë nga importet, duke mbrojtur familjet dhe industrinë dhe duke përshpejtuar kalimin drejt energjisë së pastër.

Strategjia parashikon koordinim më të fortë mes shteteve për rezervat e gazit dhe naftës, si dhe krijimin e një Fuel Observatory për monitorimin e furnizimit dhe parandalimin e krizave. Gjithashtu përfshin masa të përkohshme për konsumatorët, si mbështetje financiare, kupona energjie dhe ulje taksash për familjet vulnerabël.

Në të njëjtën kohë, BE synon të përshpejtojë largimin nga karburantet fosile përmes elektrifikimit, zhvillimit të energjisë së rinovueshme dhe karburanteve të qëndrueshme, si dhe përmirësimit të rrjeteve elektrike.

Strategjia kërkon investime të mëdha, me qindra miliarda euro deri në 2030, duke synuar përfshirjen e kapitalit privat.

Për qytetarët, kjo do të thotë më pak ekspozim ndaj luhatjeve të çmimeve të karburanteve dhe kalim gradual drejt energjisë më të pastër dhe kostove më të qëndrueshme në afatgjatë.